Byggðasafn Húnvetninga og Strandamanna

Hvítserkur

Birt í 16. apríl, 2018 af Reykjasafn

Málverk af Hvítserk við Húnaflóa. Málverkið sýnir að málarinn lítur Hvítserk nokkuð sérstæðum augum og hefur mikið hugmyndaflug.

Málverkið er í tréramma sem, er sléttur og einfaldur að allri gerð. Hann er 90 x 70 cm. að utanmáli og 59 x 79 cm. að innanmáli.

Málverkið er eftir Ísleif Konráðsson sem er strandamaður að uppruna. Ísleifur byrjaði að mála á gamals aldri og hefur hann haldið nokkrar málverkasýningar. Hann gaf safninu málverkið á opnunardegi þess 9. júlí 1967.

Ísleifur Konráðsson var fæddur á Stað í Steingrímsfirði 5. febrúar 1889. Hann var sonur Konráðs Sigurðssonar frá Stóru-Ávík í Trékyllisvík og Þorbjargar Jónsdóttur, frá Kaldranesi. Hann ólst upp hjá Ólöfu Jörundardóttur á Hafnarhólma. Ísleifur ferðaðist víða um landið í leit að myndefni, hann málaði myndir frá þeim stöðum sem honum þóttu fallegir, hrifnastur var hann þó af því að mála dranga og voga. Eftir hann liggja margar fallegar myndir.

Birt í 2018, Safngripir | Slökkt á athugasemdum

Gleðileg Jól

Birt í 23. desember, 2017 af Reykjasafn

Byggðasafn Húnvetninga og Strandamanna óskar ykkur öllum gleðilegra jóla og farsæls komandi árs. Við þökkum kærlega fyrir skemmtilegu samverustundirnar á síðasta ári og vonum að þær verði enn fleiri á því næsta.

Birt í 2017 | Slökkt á athugasemdum

Kvöldkaffi og sýningaropnun á byggðasafni

Birt í 17. október, 2017 af Reykjasafn

Miðvikudaginn 1. nóvember næstkomandi kl. 20:00 til 22:00 ætlum við á byggðasafninu að bjóða upp á kvöldkaffi og opna sýninguna „Sakamál í Húnaþingi.“

Tekin verða fyrir þrjú fræg sakamál frá 19. öld og sýndir verða gripir sem tengjast viðkomandi fólki eða viðfangsefni.

Lykilgripir sýningarinnar eru millur Agnesar, en þær eru sagðar hafa fundist með beinum hennar þegar þau voru færð í vígða mold.

Kvöldkaffið og sýningin eru styrkt af Ferðamálafélagi Húnaþings Vestra.

Við vonumst til að sjá ykkur sem flest.

Birt í 2017, Viðburður | Slökkt á athugasemdum

Grjóthleðslunámskeið

Birt í 13. október, 2017 af Reykjasafn

ATHUGIÐ

Námskeiðið er fullbókað en tekið er inn á biðlista og haft verður samband ef einhver forfallast. Haft verður samband eftir tímaröð, fyrstir koma fyrstir fá.

Vegna mikillar eftirspurnar er möguleiki á að haldið verði annað námskeið. Þeir sem skrá sig á biðlista fá tilkynningu um það áður en það verður auglýst. Vinsamlegast takið fram nafn, símanúmer og netfang.


 Mynd fengin að láni frá mbl.is

Þann 29. október næstkomandi heldur Byggðasafn Húnvetninga og Strandamanna grjóthleðslunámskeið. Drangabræðurnir og grjóthleðslumeistararnir Benjamín og Guðjón Kristinssynir stjórna námskeiðinu. Benjamín, deildarstjóri safnsins, og Guðjón hafa starfað við grjóthleðslu um árabil, þekkja vel til helstu aðferða og eru hleðsluverk eftir þá að finna um land allt. Þeir eru báðir sagnamenn miklir, segja ekki sögur nema þær séu stórlega ýktar eða verulega bættar. Því á ekki eftir að skorta skemmti- eða umræðuefni á námskeiðinu.

Námskeiðið verður haldið á safninu, á Reykjum í Hrútafirði, og er haldið í tengslum við varðveislu fallbyssustæðis frá tímum hernámsins sem er í fjörunni við hlið safnsins. Hlaðinn verður frístandandi, boginn skjólveggur vestan við byggðasafnið við hlið fallbyssustæðisins. Ætlunin er að búa til fallegt útivistarsvæði og miðla grjóthleðslukunnáttu til áhugasamra. Námskeiðið er án endurgjalds og létt hressing í boði fyrir þátttakendur.
Sólveig H. Benjamínsdóttir veitir upplýsingar og tekur á móti skráningu á netfangið solveig@hunathing.is eða í síma 771-4961.
Við vonum að sjá ykkur sem flest. Við lofum góðu puði eftir erfiða kosninganótt!

Staður: Byggðasafn Húnvetninga og Strandamanna, Reykjum í Hrútafirði.
Tími: 11:00. Námskeiðinu lýkur þegar veggurinn er tilbúinn 🙂
Án endurgjalds

Birt í 2017, Viðburður | Slökkt á athugasemdum