Nú dögunum barst Byggðasafni Húnvetninga og Strandamanna einstök og góð gjöf frá Húnvetningafélagi Reykjavíkur.
Húnvetningafélagið ætlar að beita sér fyrir úrbótum á bruna- og öryggismálum safnsins og hefur ákveðið að verja allt að 10 milljónum í verkefnið. Við sem stöndum að safninu erum einstaklega þakklát fyrir þessa rausnarlegu gjöf.
Á safninu er varðveitt einstök saga allra héraðanna við Húnaflóa. Húnvetningafélagið í Reykjavík hefur sérstaka tenginu við safnið, en það kom að stofnun þess á sjötta áratug síðustu aldar og átti raunar hugmyndina að stofnun þess. Hugmyndinni var varpað fram á aðalfundi félagsins árið 1955 og ákveðið var að hefja söfnun safngripa. En með stofnun safnsins vildu félagsmenn leggja sitt að mörkum við að sameina íbúa héraðsins og reyna að skapa vitund um sameiginlega sögu og uppruna. Búnaðarráðunauturinn Ragnar Ásgeirsson var fenginn fyrir hönd félagsins til að fara um Húnavatnssýslurnar tvær og safna gripum fyrir hið tilvonandi safn. Í þessum söfnunarferðum safnaðist mikið magn gripa sem komið var fyrir í geymslu vítt og breytt um héraðið.
Húnvetningafélagið í Reykjavík lagði því grunninn að safninu, að efnisleg menning Húnvetninga yrði varðveitt á öruggum stað. Nú kemur félagið aftur að starfsemi safnsins með ómetanlegum hætti. En með umbótum á bruna- og öryggiskerfi safnsins verður enn betur staðið að öryggi safngripa safnsins.
Við þökkum Húnvetningafélaginu í Reykjavík fyrir einstaka gjöf.
